Веста е најнова, денешна:

Иранските власти тврдат дека Техеран има цврсти докази- прецизни информации оти починал од болест.  Иранскиот министер за разузнавање Хеидар Молеши прашува: доколку ЦИА и американската војска го убиле, тогаш зошто не ги покажат фотографиите и зошто го фрлиле телото в море?

Да потсетам, телото на Бин Ладен беше погребано в море неполни 24 часа по неговата егзекуција, а ДНК тестот потврдил дека станува збор за него, а американскиот претседател Барак Обама не дозволи да се објават фотографиите од убиениот затоа што било можно тоа да покрене насилство врз американските граѓани.

Претходно Пакистан најави дека ќе започне истрага за убиството на Осама Бин Ладен. На тоа најмногу придонеле жестоките критики дека Исламабад дозволил американските специјалци да го нарушат суверенитетот на Пакистан со еднострано преземената акција. Ќе ја води армијата, а пакистанската власт е во мошне непријатна ситуација бидејќи нарушувањето на територијалниот суверенитет на земјата е неспорно. Згора на тоа, дојдоа и сомнежите на Вашингтон дека Пакистан соработувал со Ал Каеда во засолнувањето на Бин Ладен во куќата во Аботабад, каде што беше ликвидиран, а што премиерот Јусуф Џилали одлучно ги отфрли.

Очекувано, кризата помеѓу Пакистан и САД од ден на ден се повеќе се продлабочува. Во овој момент Пакистан одбива да ја објави адресата каде го засолнила семејството на Ладен уапсено веднаш по неговата ликвидација.

Имено, пакистанското Министерство за надворешни работи потврди дека нема намера да им ја открије локацијата на трите жени и осумте деца дури ни на агентите на ЦИА. Се очекува дека нивното сослушување би помогнало за расветлување на мистеријата за движењето на лидерот на Ал Каеда од 2001 -та година, но и детали за операцијата на американската морнарица.

Изнесен е податок дека 10- годишната потрага по Бин Ладен според некои процени ги чинела Американците најмалку три милијарди долари- пари потрошени за зголемување на безбедноста во земјата, за војните во Авганистан и Ирак и оние директно вложени за негово пронаоѓање.

Денеска се јавија неколкумина од синовите на Осама Бин Ладен, кои како Ал Каеда не го доведуваат под сомнеж неговото убиство, што ќе рече дека кај нив не „игра“ тврдењето на Иран,  ги критикуваа американските власти за сурово убиство на нивниот татко, нарекувајќи ја целата операција понижувачка. Тврдат дека тој бил убиен невооружен и фрлен в море.

Во изјава за најтиражниот американски весник „Њујорк Тајмс“ тие прашуваат зошто невооружен маж бил убиен наместо да биде уапсен и суден.

Во друга изјава, која исто така му се припишува на семејството на Бин Ладен, а објавена на џихадистичка веб страница, неговото погребување в море се нарекува „понижувачко“ за семејството, но исто така и се доведува во прашање дали навистина бил тоа Бин Ладен, поради тоа што не биле презентирани видео докази за тоа.

Дали се доволна потврда објавените 5 видео снимки (од кои, интересно, е отстранет аудио записот) запленети во куќата на Бин Ладен од страна на САД дека е тој навистина мртов? Пентагон потврди дека Осама останал клучен човек на организацијата се до неговата елиминација и активно ја предводел, а операциите ги надгледувал од Аботабад.

Една снимка била направена во октомври или ноември 2010. година, а на неа Осама е прикажан како подготвува порака која и е упатена на САД. Три снимки прикажуваат проба за снимање на видео порака. На петтата е прикажан како гледа телевизиска емисија за него на арапски јазик. На неа нема ништо што би укажало дека се наоѓа во куќата во која е убиен.

Би Би Си оцени дека е ова обид на администрацијата на Обама да ги убеди сите скептици дека Бин Ладен е убиен.

Од друга страна, САД објави дека во акцијата е запленета до сега најголема колекција материјал поврзан со тероризам. Во тек е проверка на компјутерите, опремата и документите запленети во куќата во Аботабод, каде што Пентагон тврди дека Осама се криел 6 години.

А колку заканите за одмазда го загрижува светот? Секако многу, иако сите се трудат, а пред се САД, да не го искажат, уште помалку да и го наметнат на јавноста.

Одмаздата беше објавена во вид на соопштение на милитантни сајтови на Интернет. Нивната автентичност не е потврдена, но се работи за сајтови на кои Ал Каеда и досега објавувала свои пораки.

„Набрзо, ако даде Бог, нивната среќа ќе се претвори во тага. Крвта ќе им се меша со солзите…Ќе останеме, ако е таква божјата волја, проклетство кое ги прогонува Американците и нивните агенти“- стои во соопштението потпишано со „Генерално раководство“.

А друга милитантна група, што се поврзува со Ал Каеда, наречена Ирачка исламска држава, која исто така се закани со акции на одмазда, се обврза на верност на вториот човек во хиерархијата на терористичката организација, Ајман ал Завахири. Познато е, тој е египетски доктор кој долго време се сметаше за втор човек во Ал Каеда.

Што ќе се случува во наредниот период, не се осмелуваат да прогнозираат ниту најголемите светски експерти и аналитичари. Едно е сигурно: со смртта на Осама Бин Ладен на тероризмот не му е зададен смртоносен удар. Напротив.

Каква последна- претсмртна видео порака снимил Ладен?

Очекувано одговор на Ал Каеада: први жртви на одмазда

Се чини дека во наредните часови, денови, недели, можеби и месеци (имајќи го предвид „редоследот“) дежурна тема, што ќе рече секојдневна, ќе биде убиството на Осама бин Ладен. Нема да ја замени ниедна друга, освен ако се случи некаква катастрофа- катаклизма (не дај Боже) или, на пример, дојде до „ненадејна средба“ на човечката со друга, непозната, вонземна цивилизација.

Официјално:

Со анализа на ДНК е потврдено дека водачот на терористичката организација Ал Каеда е убиен. Со анализата е утврдено совпаѓање на ДНК, а потоа неговото тело е погребано, изјави официјално лице под услов да остане анонимно.

Како што соопшти вишо разузнавачко лице на конференција за новинари, САД користеле повеќе различни средства за идентификација. Притоа додал дека жена, веројатно сопруга на Бин Ладен, го потврдила неговиот идентитет.

Пакистанската телевизија објави фотографија на убиениот бин Ладен. Погребан е в море оти се сакало по секоја цена да се избегне гробот на Бин Ладен да стане место на аџилак. Притоа, Американците ги почитувале сите верски обврски. Имено, според исламската традиција телото мора да го измијат муслимани и да го погребаат што е можно побрзо, најчесто до следната молитва, иако може да има одложувања под посебни околности.

Фотографијата не мртвиот Осама не ги убеди баш сите дека е тој навистина мртов. Имено, таа има премногу сличности со една која е направена додека бил жив. Автентичноста не ја потврдија американски, а ни пакистански официјални лица. Телевизијата NBC јави дека добила предупредување од две американски официјални лица оти фотографијата е лажирана!

Во меѓувреме, француската новинска агенција АФП извршила проверка на веродостојноста со специјален софтвер. Било потврдено дека станува збор за фотомонтажа, на која била искористена брадата и долниот дел од лицето на Бин Ладен.

„Брадата на снимката е матна. Јасно се гледа дека тоа е фотомонтажа“, изјавил главниот уредник на фотографскиот сектор во АФП, Младен Антонов.

Според „Асошиејтед Прес“, Белата куќа сеуште не одлучила дали да објави фотографски докази дека водачот на Ал Каеда е мртов.

Најнова вест:

Амбасадорот на Пакистан во САД, Хусаин Хакани, изјави дека Исламабад ќе преземе целосна истрага за пропустите на неговите разузнавачки служби во потрагата по Осама бин Ладен.

„Очевидно е дека Бин Ладен имал мрежа која го поддржувала. Треба да дознаеме дали таа мрежа се наоѓала во Владата, во пакистанската држава или пакистанското општество“, објасни тој во интервју за Си-Ен-Ен.

Ќе биде извршена целосна истрага за да се утврди зошто пакистанските разузнавачки служби не успеале да го откријат порано.

Пакистанскиот претседател Асиф Али Зардари денеска негираше дека пакистанските безбедносни сили го криеле Бин Ладен, истакнувајќи дека соработката со САД придонела да биде лоциран најбараниот терорист во светот.

Тоа е прв официјален одговор од Пакистан на сомневањата кои ги изнесоа одделни американски претставници и други критичари, а кои би можеле дополнително да ги влошат односите помеѓу Исламабад и Вашингтон во критичен момент за војната во Авганистан.

Од друга страна, „Њујорк тајмс“ објави дека официјален Пакистан знаел каде се крие водачот на Ал Каеда!

И уште една очекувана, загрижувачка вест:

Само неколку часа по објавувањето на веста дека Осама бин Ладен е убиен во Пакистан, во земјата во близина на една џамија во Чаршада одекнала експлозија во која загинаа жена и три деца.

Истовремено, во САД безбедносните мерки се подигнати на највисоко ниво.

Светот е внимателен поради можните одмазди на Ал Каеда. Тоа најмногу се забележува на аеродромите во Лос Анџелес и на улиците на Њујорк, што не би требало да зачудува со оглед на тоа дека од Пакистан веќе пристигнаа првите закани од следбеникот на бин Ладен.

Американски разузнавачи веруваат дека водачот на Ал Каеда непосредно пред смртта снимил пропагандна порака која наскоро би можела да се појави во јавноста. Не е јасно дали се работи за аудио или видео снимка, но едно неименувано американско официјално лице тврди дека материјалот веќе влегол во „процедура“ за објавување во медиумската мрежа на Ал Каеда. Тој вели дека нема назнаки оти Бин Ладен во моментот на снимање на пораката знаел дека минутите му се изброени.

Советот за безбедност на ОН го поздрави фактот дека Осама бин Ладен веќе нема да биде во можност некому да му наштети и истакнува дека таа вест претставува „суштински напредок“ во борбата против тероризмот.

Високата претставничка на ЕУ за надворешна политика и безбедност, Кетрин Ештон, изјави дека со убиството на Бин Ладен и е зададен удар на Ал Каеда и на терористичките активности ширум светот.

„Сега треба да сториме се што е во наша моќ во целост да ја онеспособиме Ал Каеда, зашто постои голем ризик од одмаздничка акција“, додаде таа.

Кина е последната голема земја која реагира на смртта на Осама бин Ладен. Оценува дека неговото убиство е „позитивен развој на настаните“ во борбата против тероризмот и повикува на јакнење на соработката во светот во таа борба.

САД ги затворија за јавноста амбасадата и три конзулати во Пакистан откако Осама бин Ладен е убиен во близина на престолнината Исламабад.

Повеќе стотици луѓе вчера излегоа на улиците во југозападниот град Кета, во близина на границата со Авганистан, за да му оддадат почит на бин Ладен и да протестираат против САД.

Објавено е дека претседателот на САД, Барак Обама, и негови најблиски соработници во Белата куќа во живо го следеле убиството на Осама бин Ладен. На шлемот на еден од специјалците, припадник на единицата „фоки“, била прицврстена камера која го пренесувала текот на акцијата кон Вашингтон.

Инаку, по смртта на бин Ладен се појавија шпекулации за тоа кој ќе стане нов лидер на Ал Каеда. Според мислењето на разузнавачки стручњаци, прв кандидат за наследник е Египтјанинот Ајман ел- Завахри (59) кој беше личен лека на бин Ладен.

Интересно е дека оперативците на ЦИА за Осама бин Ладен користеле шифрувано име „Џеронимо“. Кога водачот на Ал Каеда паднал смртно погоден, официјалната информација од ЦИА за претседателот Обама не била „Бин Ладен е мртов“, туку „Џеронимо е мртов во акцијата“.

Џеронимо (1829. – 1909.) е американски Индијанец, припадник на племето Апачи, кој се борел против Американците и Мексиканците кои сакале да ги прошират своите територии на сметка на земјата на Апачите. По години минати во бегство и борба, умрел како затвореник на САД.

Последна вест:

Синеастите кои ја снимија драмата за борбата против терористи „Катанец за бол“ подготвуваат акционен трилер за потрагата по Осама бин Ладен.

Како што јавија светските агенции, лице блиско на проектот, кое инсистирало да остане анонимно оти нема одобрение да зборува, рекло дека оскаровката Кетрин Бигелоу и сценаристот Марк Бол веќе неколку месеци работат на тоа проектот да биде фокусиран на акција на фаќање на водачот на Ал Каеда.

„Холивуд рипортер“ објави дека Бигелоу сигурно ќе го менува сценаериото со оглед дека американските сили го убија бин Ладен во ноќта помеѓу саботата и неделата во Пакистан, а нејзиниот проект бил заснован на еден поранешен обид на фаќање на водачот на Ал Каеда кој завршил со фијаско.

Дали долгонајавуваната предупреда дека е „последен миг“ светот да стори нешто за натамошниот сопствен опстанок, за повторно враќање на климатската рамнотежа  веќе не важи? „Мигот“ помина, та катаклизмичките промени на климата, како нејзино возвраќање на ударот, веќе започнаа? Не е ли ова „почеток на крајот“?

Луѓето се загрижени,  се потешко се адаптираат на брзите промени, и тоа од час во час, имаат се поголеми здравствени проблеми. Зимава не била толку „необична“ со години, децении, а и есента не мина баш „најдобро“.

Што се однесува на нас, во Македонија, олку „вода“ не паметат ниту најстарите. Земјата веќе не ја прима, реките и езерата преполни, овде- онде се излеваат, а е реално стравувањето дека се можни поплави од поголеми размери, со непредвидливи последици.

И САД и Европа ги зафати снежно невреме. Вашингтон е парализиран, државите Вирџинија и Мериленд бараат помош. Агенциите јавуваат дека националната метеоролошка служба прогнозира оти бурата, наречена „снежно уништување“, ќе ја зголеми снежната покривка во североисточниот дел на САД за 36 сантиметри. Веќе има 91 сантиметар снег. Патиштата се блокирани, а некои се покриени со дебела ледена покривка.

Проблеми и низ цела Европа. Силни врнежи на снег, кои според метеоролозите ќе продолжат и во наредните недели.

Градовите низ Германија со недели се покриени со мраз и снег, а на некои места мразот е дебел и повеќе од 10 сантиметри. Снежните врнежи предизвикаа проблеми во Белгија, каде што се блокирани патишта во должина од 920 километри, што претставува рекорд во споредба со блокираните 520 километри во декември. Во северниот дел на Франција се блокирани неколку патни правци, а бројот на летови од парискиот аеродром „Шарл де Гол“ е намален за 20%. Со снежно невреме се зафатени Полска, Чешка, Шведска, Финска…

Изобилни снежни врнежи се забележани во Варшава, Познањ, Вроцлав и други делови на Полска. Во Чешка ситуацијата е најтешка во североисточните делови. Многу патишта се непроодни, а постојат проблеми во снабдувањето со електрична енергија. Невремето во Шведска се движи кон северот и западот. На југот од земјата многу возови доцнат или се откажани поради изобилен снег и силни ветришта. Во главниот град на Финска, Хелсинки, висината на снегот надмина 70 сантиметри, а метеоролозите најавуваат дека деновиве снег посилно ќе паѓа во областа на Балтичкото море.

Во Швајцарија се забележани голем број на сообраќајни незгоди оти патиштата се покриени со снег. Изобилни снежни врнежи повторно го пореметија автомобилскиот сообраќај во Белгија, Словенија и Унгарија. Бурата што ја зафати Италија донесе ветришта со јачина на ураган во североисточните делови на земјата, како и силни дождови и свлечишта на југот. Поради снегот во Велика Британија дојде до пореметување во авиопревозот. Во Франција многу летови се откажани.

И Балканот не остана „покус“. Со невреме се зафатени подрачја на Србија и Хрватска. Леден дожд и виулица со силен ветер го зафати Белград, а посебно Војводина. Во Хрватска снегот паѓа непрестано и го пореметува сообраќајот во средниот и северозападниот дел на земјата, Лика, Горски Котар и Славонија. Метеоролозите најавуваат дека и во наредните неколку дена ќе преовладува облачно време со снег. Се очекува температурата да падне и до минус 10 степени Целзикусови.

Треба да се потсетиме дека вакво невреме, не само во зимскиот период, ширум Европа, САД и други делови на светот се случуваше и во изминатите 3-4 години.

Објавувањето на крајот на рецесијата во САД не беше никаков „популистички трик“ за враќање на оптимизмот на американскиот граѓанин, туку заклучок врз основа на економските показатели. Меѓутоа, многумина, особено од бизнисот, беа и се воздржани и внимателни. Го имаат предвид последниот национален извештај  за декември, кога во САД се затворени 85.000 работни места, и тоа без оглед на забележаниот економски раст во третиот и чевртиот квартал од минатата година.

Британската агенција Ројтерс наведе дека порастот на вработување е бавен на крајот од секоја рецесија, без оглед на опоравувањето на стопанството. Нешто што очигледно не го знаат „експертите“ од македонската политичка опозиција, па ја обвинуваат Владата дека не направила и не прави ништо за макар мало- минимално намалување на енормниот број на невработени во Македонија. Сеопак, многумина во САД веруваа дека стапката на невработеност во САД ќе почне да опаѓа побрзо.

Интересно е дека стапката на невработенот од 10% доведе до намалување на обемот на работната сила. Прегледот на ситуацијата во домаќинствата укажува дека работната сила е намалена за 661.000 луѓе во декември.

Најновите прогнози се дека невработеноста до крајот на годинава ќе се намали незначително- на 9,8%, на крајот на 2011- та се очекува таа да изнесува 8,9%, а дури на крајот на 2012-та се предвидува стапката на невработеност да падне на 7,9%.

Стапката на инфлација во САД се очекува годинава да се движи околу 1%, следната година 1,4%, а во 2012-та 1,7%.

Затоа е тоа „главната црвена линија“ на Грција, од која нема да остапи „по никоја цена“.

Затоа и експлицитните ступидни барања за ограничена (зло)употреба на „придавката“ македонски (во случајов таа воошпшто не е тоа) имаат предвиден „празен простор“ за премолчена „отстапка“.

„Едно име за севкупна употреба“ не значи ништо друго, освен самоукинување, самообезличување, „доброволно бришење“ од мапата на народите на светот. Имено, доколку се прифати, тоа неминовно ќе се „рефлектира“ и на името на народот (мнозинската заедница во Република Македоникја) и на неговиот јазик, култура, корени, традиција, минато…

Конкретно: ако се прифати „се чини најприфатливото“ решение „Северна Македонија“ (сеедно дали „Република“ пред или помеѓу) со „севкупна употреба“ (значи и внатре- во земјата и на меѓународен план), неминовно е народот во неа да се вика „северномакедонски“, што значи „дојден од север“, и се од него и што се однесува на него да биде „северномакедонско“. Со други зборови, дека е тоа народ кој се изделил од „некој“ што се нарекувал македонски, а во меѓувреме исчезнал (зашто нема негови други „делови“). „Паднал од небо“ на ова тло, со „зачувана меморија“ за изделувањето, па се нарекол „северномакедонски“. Никако не значи дека постојат и јужно… и западно…и источномаедонски, како што поддржувачите на овој предлог наивно веруваат. Од проста причина што не можат никаде да се лоцираат (каде се, каде „егзистираат“?).

Како минува времето, без оглед на надворешните и внатрешните притисоци, се повеќе „само по себе“ се наметнува единстеното решение на овој ступиден проблем- кал што сама си го создаде Грција, па сега не знае како да излезе, да се спаси: не „двојна формула“, туку, како што веќе се заложив, алтернативно (едно) или алтернативни (повеќе) имиња на земјава. Само тоа ја овозможува бараната „клучна отстапка“ од Република Македонија: имиња за севкупна употреба (и внатре и надвор). Едновремено не остава никаков простор за наметнато или постапно-премолчено губење на идентитетот на македонскиот народ во сета негова комплексност.

Инаку, се почесто познати, истакнати европски политичари и аналитичари недвосмислено изразуваат неразбирање, неприфаќање, па и револт од однесувањето на Грција.

Една од нив е европратеничката Дорис Пак, која пред два дена изјави на прес конференција во Софија, на меѓународната трибина „Европа 2020- граѓанска визија“:

„Македонија не е падната од небо. Како е возможно да се оспоруваат имиња? Се срамам оти една европска држава може да се однесува на начин на кој што се однесува Грција“.

Бугарската агенција Бгнес пренесе дека таа изнела редица препораки до Грција поврзани со подобрувањето на нејзините односи со соседите.

Изнесувањето на ваков јасен и дециден став на Пак не и е првпат. Таа на неколку наврати застана во одбрана на правото на Македонија да го користи своето уставно име и ја осуди Грција што го оспорува приемот на државата во ЕУ.

Во земјава престојува финскиот шеф на дипломатијата, Александар Стуб, се разбира со јасна цел: да „придонесе“ за што поголем притисок врз Македонија.

Гостинот од Хелсинки април го одреди како временска рамка до кога би требало проблемот да се реши, а за што е потребно многу посуштински да се навлезе во него.

Тој потенцира дека Финска нема намера да посредува во македонско- грчкиот дијалог, но смета дека е неопходно да се инволвира некоја од моќните земји на ЕУ, како на пример Германија, Франција или Велика Британија:

„Се надевам и верувам дека она што не успеавме да го постигнеме во декември 2009- тата ќе успееме да го постигнеме во март или најдоцна до април годинава. Сметам дека треба да водиме сериозни разговори за спорот со името“.

Во пресрет на посетата на медијаторот Нимиц на Скопје и Атина, најавена за крајот на месецов, домаќинот- министерот Милошоски упати порака до јужниот сосед да демонстрира искрена волја, а не само декларативно да се залага за изнаоѓање на компромис:

„Македонија ќе биде подготвена за компромис што се однесува на спорот за името, но кој ќе го зачува нашето национално достоинство, нашиот национален идентитет, идентитетот на нашиот јазик и нашето суверено право. Крајната одлука за сите важни прашања, вклучувајќи го и името на Р. Македонија, ќе ја донесат нашите граѓани“.

Во меѓувреме продолжуваат јаловите обиди на Грција оние што не и се премногу наклонети (пред се поради свои интереси и позиции) да го разберат нејзиниот проблем и да и дадат поддршка. Особено сега, кога е јасно дека и на Европа и на „големите и малите“ надвор од неа „спорот“ им е веќе преку глава.

Грчкиот заменик- министер за надворешни работи Димитрис Друцас замина во посета  на САД, на разговори за „спорот“, но и за грчко-турските односи, кипарското прашање, соработката помеѓу Атина и Вашингтон, како и за можноста за укинување на американските визи за грчките граѓани.

Во интервју за грчкиот весник „Етникос кирикс“, тој вели дека очекува од САД да играат конструктивна улога во напорите да се најде решение „и затоа е важно Вашингтон да биде добро запознаен со грчките позиции, кои се познати и јасни: име со географска одредница за севкупна употреба“.

Договорени се средби со американскиот државен секретар Хилари Клинтон, првиот заменик- државен секретар Џејмс Стајнберг, како и со повеќемина сенатори и конгресмени. За утре се закажани средби во седиштето на Обединетите нации, а на 4- ти февруари тој ќе разговара со генералниот секретар на ОН, Бан Ки-мун.

Со веќе познати ставови „се јави“ и претседавачот со Советот на министри на ЕУ, Мигел Анхел Моратинос. Тој во интервју за белградскиот весник „Вечерње новости“ нагласува дека шпанското претседателство со ЕУ ќе настојува да биде постигнат напредок во однос на стартот на пристапните преговори со Македонија, штом биде решено прашањето за името „за што сме оптимисти“.

А едно многу важно филмско остварување почнува да го обиколува светот и да го потсетува на апсурдниот, ступидниот проблем што го наметна  Грција. Имено, филмот „Име си е име“, посветен на македонскиот народ и проблемот со името на неговата држава што го има Грција, започнува да се емитува „тргнувајќи“ од САД. Тој е дел на исландскиот режисер Сигурјон Еинарсон, продуцент е Џејсон Мико, а музиката ја напиша и ја изведува фронтменот на групата „АХА“, Мортен Харкет.

На еден скандинавски патник неколкумина Македонци му објаснуваат што значи да си Македонец. Еинарсон Македонците ги нарекува „нација во заложништво поради своето име“.

Премиерата ќе се одржи со помош на Обединетата македонска дијаспора во САД, а се очекува присуство на политичари, претставници од американскиот конгрес и дипломатскиот кор, како и Македонци кои живеат во Вашингтон.

Во изработката на „Име си е име“ учествуваа луѓе од Македонија, Исланд, САД, Норвешка, Велика Британија. Светската премиера веќе се одржа, во октомври минатата година во Торонто, Канада.

Интересно е што американската премиера на филмот беше предвидено да се одржи во резиденцијата на исландскиот амбасадор во Вашингтон, но е откажана поради притисок на грчката дипломатија и дијаспора. Тоа секако значи јасна најава дека допрва ќе има проблеми со “одот низ светот“. Впрочем, како што има проблеми секоја вистина болна за оние на кои таа се однесува. ѓ

Во земјава, пак, „нормално“, не „мирува“ тн. невладин сектор, поточно делот од него кој е директно илио индиректно „врзан“ за „неутралниот“ Институт Отворено општество (на чело со „неутралниот“ Владимир Милчин). Најновиот „успех“ е „откритието“ дека „загрижува назадувањето на Македонија во исполнувањето на европските закони“.

Институтот Отворено општество и Македонскиот центар за европско образование „МЦЕО“ дојдоа до „големо откритие“: во денеска презентираниот квартален извештај потенцираат дека од вкупно 108 Владата донела „само“ 46 закони со европското знаменце, а голем дел од донесените минатата година не се според програмата НПАА 2009/10 година која подразбира целосно преземање на законодавството од ЕУ.

„Триумфална“ изјава на Лидија Димова од МЦЕО:

„Весела математика се тврдењата на владините претставници дека земјава исполнила 75% од ЕУ законите. Овој извештај јасно покажува дека од вкупно 184 донесени закони само 46 се со европското знаменце, додека останатите се антикризни закони на Владата“.

Забележан „делумен напредок“ има само во донесувањето на законите од областа на полицијата, царината и статистиката, додека како проблеми кои се уште и пречат на земјава во ЕУ – интеграциите се големите измени на веќе постоечките закони, паѓањето на голем број на закони пред Уставниот суд, донесувањето на закони по скратена постапка, како и спорот за името со Грција.

Се разбира, ваквите „невладини институции“ не би биле тоа ако не и упатат „сериозна порака“ на Владата, односно ако не ја советуваат и предупредуваат: во наредниот период таа треба во целост да се ангажира во усогласување на македонските со ЕУ законите, во делот на изготвување на подзаконските акти од Законот за државна администрација, зајакнувањето на внатрешната контрола и во делот на ревизијата.

Усогласувањето на македонското со европско законодавство бил и е еден од приоритетите- предусловите на земјава за побрзо евроинтегрирање, но малиот број на веќе усогласените во моментов не е „горлив проблем“. Поинаку ќе „изгледаше“ оваа „невладина активност“ (квартален извештај) доколку Димовска не „згрешеше“ во „сериозната порака“: наместо последен во редот проблеми, спорот за името со Грција да го ставеше прв.

Всушност, признал или не признал „тоа му е“, противниците- републиканците се чини брзо се „созедоа“, па ја однесоа и првата(?) победа на изборите за сенатор на Масачусетс.

Се проценува дека има три клучни „моменти“ на дебаклот во првата година од владеењето на Барак Обама: невработеноста, која достигна 10%, необновен- незаживеан пазар на недвижности (еден од најпогодените од рецесијата, но и „највиновен“ за неа) и неминовноста од скорешно зголемување на даноците (веќе најавено). Не треба да се заборави и на претстојните мошне болни и тешки, но ветени реформи во здравствениот систем.

Меѓутоа, Обама не би бил она што несомнено е- голем лидер, ако не заземе јасен и „бескомпромисен“ став, особено кога станува збор за него лично, поточно за неговиот претседателски мандат.

Забележана изјава за телевизијата АБЦ, која наиде на големо одобрување кај американската јавност:

„Попрво би бил добар претседател во еден мандат, отколку просечен во два“.

Задутре тој ќе го одржи првиот говор за состојбата на нацијата на заедничка седница на двата дома на Конгресот.

А пред неколку дена Белата куќа и јавно презеде дел од одговорноста за губењето на мнозинството во сенатот. Коментар на изненадениот и мошне лут Барак Обама за поразот во Масачусетс:

„Истата работа која што го внесе Скот Браун во канцеларијата ме внесе и мене, а тоа е незадоволството на луѓето кои се бесни и фрустрирани. Тоа не е само поради она што се случи во текот на минатата година, туку она што се случува во последниве 8 години“.

Всушност, не станува збор за сосема неочекувана, уште помалку за шокантна победа на републиканците. Се работи за место изгубено уште во 1953-та година, кога го освои Џон Кенеди, а потоа го држеше неговиот брат Теди Кенеди цели 47 години. Од друга страна, токму тој податок- да не се победи ни по повеќе од 4 ипол децении, најмногу „пече“: луѓето незадоволни, „бесни и фрустрирани“, а сепак гласаа за оние што ги „направија“ такви. Се разбира, допрва ќе се анализира зошто е така.

Очевидно, такви неопходни, долгорочни жаришта се Ирак и Авганистан. Во нив се „најевидентни“ токму интересот и балансот на моќта, а и на лаикот одамна му е јасно дека можат да се „угаснат“ мошне брзо, за само неколку месеци. Напротив, внатрешните судири не се спречуваат, тие се латентни, без никаков обид да запрат. Зад „кулисите“ дури и се поттикнуваат, пресметувајќи ги огромните цивилни жртви како „колатерална штета“.

Најнов ненадеен и „необичен“ воен „инцидент“ се случи денеска изутрина во главниот град на Авганистан. Како што јавија светските новински агенции, во добро организирана акција талибанците го нападнаа добро бранетиот центар на Кабул.

Имено, група на талибански воини изведе серија на напади во кои има десетици мртви и ранети.

Целта е јасна: зградите на владините министерства и претседателската палата. Главната акција е осуетена, неколкумина напаѓачи извеле самоубиствени напади, додека другите се повлекле во еден трговски центар каде што се забарикадирале. Уследиле повеќечасовни борби по кои, како што известија авганистански извори, „напаѓачите се неутрализирани“.

Борбите траеле речиси 5 часа, а авганистанскиот претседател Хамид Карзаи изјави дека ситуацијата е под контрола и редот е повторно воспоставен.

Првите проценки на аналитичарите се дека во најновата акција во Кабул талибанците сакале да ја нападнат претседателската палата и зградите на министерствата за правда, финансии, одбрани и единствениот кабулски хотел со пет ѕвездички, „Серена“, во кој одседнуваат странски дипломати и новинари.

Конкретно:

20-тина талибански борци, од кои неколкумина опашани со бомби за самоубиствена акција, се обиделе околу 9 часот исутрината да се пробијат до своите цели, но во тоа биле спречени. Во очај барем двајца ги активирале бомбите на своите тела, додека други, во повлекување, го зазеле големиот трговски центар. Уследиле жестоки судири со авганистанската полиција и по повеќе од 5 часа борба талибанците се ликвидирани. Моментниот биланс покажува дека во борбите загинале најмалку 14 лица, а 38-мина се ранети.

Се претпоставува дека конкретен повод за нападот била свеченоста во претседателската палата на која неколкумина министри требало да положат заклетва. Имено, во саботата парламентот ја имаше втората рунда на гласање за министрите кои ги предложи шефот на државата Карзаи, а притоа пратениците избраа 10-мина од 17-темина колку што биле предложени. Со тоа бројот на изгласаните министри е зголемен на 14-мина од вкупно 25-мина, колку што има места во новата авганистанска влада.

Меѓутоа, некои сметаат дека во оваа акција има „нешто повеќе“- дека претставува и своевиден сигнал за САД и западната алијанса кои во последниве месеци се обидуваат со јакнење на своите трупи во Авганистан да обезбедат конечна победа во војната со талибанците. Се потсетува и дека таа уследила неполни две недели во пресрет на големата меѓународна конференција во Лондон (на 28. јануари), посветена на разрешувањето на авганистанскиот „јазол“. Таа се најавува како „последна шанса“ да се утврди завршна, но и успешна стратегија за окончување на странската интервенција во Авганистан, а што и овој најнов напад во „срцето“ на главниот град на Авганистан сериозно ја доведува во прашање.

Специјалниот американски пратеник за Авганистан Ричард Холбрук предупреди дека вакви напади од талибанците може да се очекуваат и во иднина.

Командата на мисијата на НАТО -ИСАФ, која ја обезбедуваат македонски војници, не била цел на талибанските напади.

Во поновата историја на тектонските движења на Земјините плочи и земјотресите по нивните рабови, земјотресот на (12.01) ќе биде забележан како еден од најсилните-7 степени според Рихтеровата скала. По него се забележани уште 30-тина помали, од кои 10-тина со магнитуда поголема од 5 степени.

Епицентарот бил на 15 километри западно од главниот град на Хаити- Порт-о-Пренс.

Веќе се познати и некои други детали:

Земјотресот настанал во внатрешноста, околу 16 километри западно- северозападно од Порт-о-Пренс, на длабочина од 13 километри. Тој бил почувствуван и во Јамајка, Каракас и соседната Доминиканска република. Настанал во близина на северната граница на областа каде што карипската тектонска плоча налегнува на северноамериканската.

Светот реагира:

Американската крајбрежна стража ги премести бродовите и авионите поблиску до Хаити за да бидат подготвени за дотур на хуманитарната помош. Мексико и Франција испратија спасувачки служби за пронаоѓање на преживеани, а Германија, Британија и Венецуела испратија помош во пари, храна, лекови и вода за пиење.

Сликата од главниот град е стравична: по улиците илјадници мртви тела под тропското сонце- се заканува епидемија. Болниците работат речиси без лекарски персонал. Очајот и гневот расте поради бавното пристигнување на помошта, па граѓаните прават барикади-ги затвораат улиците со трупови.

Прва реакција на американскиот претседател Барак Обама:

„И наредив на мојата администрација да преземе брза, координирана и агресивна акција. Јасно му кажав на националниот тим за безбедност дека ова е врвен приоритет“.

Воздушниот простор над Хаити е затворен поради неорганизираност и оштетеност на аеродромот, а авионите надлетуваат со надеж дека ќе имаат гориво да се вратат. На пат кон островот е американски нуклеарен носач на авиони кој ќе биде искористен за слетување на хеликоптерите, пречистување на вода и болница.

Вчера американскиот државен секретар Хилари Клинтон го посети Хаити, при што се сретна со претседателот Рене Превал и од него побара прогласување на вонредна состојба, со што американските трупи би можеле да се справат со вооружените банди.

„Ова е многу тешка мисија за нас поради разурнувањата, малиот аеродром и уништените патишта. Сепак, секојдневно носиме повеќе помош и јас сум горда на напорите што ги преземаме во име на американскиот народ“, изјави Клинтон.

На островот пристигнаа припадници на американската елитна 82 – ра падобранска дивизија.

Обама одобри мобилизација на воени резервисти кои ќе бидат ангажирани да му помагаат на населението на Хаити, а Белата куќа соопшти оти според одобрението што го потпишал претседателот, Министерството за одбрана ќе може да ги повика пред се резервистите од медицинската струка, кои ќе бидат користени на ограничена основа, но се уште не се знае колку луѓе ќе бидат регрутирани.

Новинските агенции пренесоа дека претседателот на Никарагва Даниел Ортега ги обвинил САД дека го користат хаосот на Хаити за трупање на воени сили на островот. Пентагон досега испрати 10.000 војници, воени бродови и медицински екипи.

За помош на настраданите се помоли папата Бенедикт 16- ти:

„Нашите мисли се со луѓето на Хаити. Дознав за исчезнатиот бискуп и за многумина свештеници. Ги охрабрувам напорите на хуманитарните организации, се молам за повредените, бездомниците и за оние кои трагично ги изгубија животите“.

Најновата вест е дека САД се загрижени поради ризикот од појава на беззаконие на Хаити, но не планираат да воспоставуваат полициска контрола во земјата. Мминистерот за одбрана Роберт Гејтс нагласил дека сепак американските сили на Хаити имаат надлежност да ги заштитуваат локалните жители или себе си, доколку се најдат во таква ситуација.

„Со оглед дека не постои можност на населението да му обезбедиме доволно храна и вода, постои опасност некои лица во состојба на очај да прибегнат кон насилство“.

Гејтс потенцирал дека САД и Обединетите нации заеднички ќе работат во насока на гарантирање на безбедноста во државата.

Американскиот министер за национална безбедност Џенет Наполитано изјави дека САД привремено ќе прифатат деца кои останале без родители. Ова хуманитарно решение ќе овозможи тие да можат да бидат посвоени во САД.

Британската хуманитарна организација „Оксфам“ соопшти дека нејзините активисти успеале да им разделат храна и вода на преживеани сместени во еден импровизиран прифатен центар.

Централата на Црвениот крст во Женева информира дека нејзините припадници на Хаити работат без престан и оти се уште веруваат дека ќе пронајдат преживеани под урнатините. Тие ситуацијата ја оценија како „најтешка логистичка трагедија досега“ со која организацијата се соочила.

Во посета на Хаити допатува генералниот секретар на Обединетите Нации, Бан Ки-Мун, кој лично се увери во ситуацијата на терен.

Во меѓувреме трае операција за погребување на телата на загинатите. Камиони ги истоваруваат телата во масовни гробници и веднаш се погребуваат.

Италија е подготвена да му го отпише долгот на Хаити како дел од напорите да и помогне на опустошената сиромашна карипска држава, соопшти италијанскиот министер за надворешни работи Франко Фратини. Долгот е во висина од околу 40 милиони евра (57 милиони долари). Италија веќе се ангажира за обезбедување помош за Хаити во висина од 5 милиони евра.

Пред два дена, Франција го повика Парискиот клуб на кредитори да ги забрза плановите за отпишување на долговите на Хаити.

Високиот претставник на Европската унија за надворешни работи и безбедносна политика Кетрин Ештон денеска во Брисел одржа вонредна седница со министрите за развој од земјите членки на ЕУ поради давање помош на жртвите од катастрофалниот земјотрес на Хаити. Министрите ја разгледале и процениле ситуацијата и се договориле да се започне со итна координирана акција за подршка на напорите за расчистување, како и реконструкција на патната инфраструктура. Ештон в среда ќе отпатува во САД на разговор со американскиот државен секретар Хилари Клинтон и генералниот секретар на ОН, Бан ки-Мун.

„За обнова и јакнење на институциите на државата ќе бидат потребни околу 10 милијарди долари меѓународна помош“, изјави претседателот на Доминиканската република, Леонел Фернанез на првиот меѓународен состанок посветен на обновата на разурнатата држава. Предложено е да се изврши проценка на економските последици од земјотресот и да се утврдат приоритетите, а по тој повод во Монтреал на 25-ти јануари ќе се одржи меѓународна донаторска конференција.

Конечниот биланс на настрадани и повредени од земјотресот се уште не е точно утврден.

Владата на разурнатиот Хаити прогласи 30- дневна жалост.

Најголемата поддршка што во последно време САД и ја даваат на една земја е Република Македонија. Во подолг период, а вистинска кулминација доживеа на штотуку завршениот самит на НАТО во Букурешт- Романија. Тоа не значи никаква утеха за „поразот“ со недобивањето на покана за членство (во наводници зашто веќе го искажав и аргументирав ставот дека всушност е поразена, и тоа жестоко, Грција- удавена во сопственото примитивно националистичко мочуриште), туку нешто што веќе ги загрижува и нашиот јужен сосед (поради последиците од „Пировата победа“ која е пред се над најмоќната сила на светот), но и нејзините европски сојузници во НАТО (не сите). Ова особено се однесува на земјите од „стара Европа“.

Од говорот на претседателот на САД, Џорџ Буш, на централниот плоштад во Загреб, пред илјадници граѓани, како и државните раководители на Хрватска, Македонија и Албанија:

„Американската позиција е јасна: Македонија треба да го заземе своето место во НАТО што е можно побрзо“.

Изразувајќи жалење поради тоа што НАТО не и врачи покана на Македонија на самитот во Букурешт само поради нејзиното име, тој истакна:

„Македонија спроведе тешки реформи во земјата и придонесува значајно во мисиите на НАТО во странство. За жал, поканата за Македонија беше одложена поради несогласувањето околу нејзиното име. Во Букурешт сојузниците во НАТО се согласија дека штом ова прашање биде решено, на Македонија ќе и биде упатена покана.

Почестен сум што сум овде со лидерите на Македонија, Албанија и Хрватска. САД ја ценат водечката улога што ја покажавте во остварување на целите за слободата. Се радуваме што Албанија и Хрватска се поканети во НАТО и го очекуваме моментот Македонија наскоро да се придружи на овој голем сојуз за слобода“.

Тој нагласи дека поканата за влез во НАТО за Хрватска и Албанија е глас на доверба дека ќе продолжат со потребните реформи и силно ќе придонесуваат за вредностите на Алијансата.

„Од овој момент па натаму, ако каква и да е опасност им се закани на вашите народи, САД и НАТО ќе стојат со вас и никој никогаш повеќе нема да може да ви ја земе слободата“, нагласи Буш пред претседателот и премиерот на Македонија, Бранко Црвенковски и Никола Груевски.

„Денес војниците од Македонија, Албанија и Хрватска храбро служат во Авганистан, да му помогнат на народот и да обезбедат посигурна иднина. Денес силите на Македонија, Албанија и Хрватска служат и во Ирак, помагајќи да се изгради општество кое го одбива теророт и живее во слобода“, потенцира американскиот претседател.

Ако се суди според „чудното однесување“ на американскиот државен врв, пред се на американската дипломатија, кое може да се „препознае“ како молчење и повлекување од вревата на јавноста, нешто како да се „тркала“. Можеби не „стапица“ од која, како што објавија грчки весници, Грција има се поголем уплав, ама нешто како од „Голем брат“ многу веројатно.

Од друга страна, зошто решението што наводно го подготвуваат Американците би било „стапица“, кога во овој „пресуден момент“ за Грција е најповолно „разумно компромисно“?

Повикувајќи се на неименувани високи американски дипломати, „Елефтеротипија“ објави текст под наслов „Американска стапица за името“, во кој тврди дека името на ПЈРМ ќе биде Република Северна Македонија, а терминот „македонски“ ќе се употребува за одредување на идентитетот и јазикот. И уште- дообјаснувањето околу користењето на новото име, за што Грција инсистира да биде „ерга омнес“ (сеопшто односно единствено), ќе се остави за понатамошниот тек на преговорите.

Администрацијата на Обама преку посредникот Нимиц ќе изврши притисок врз Атина и Скопје за  вакво решение на спорот со името. Планот на Вашингтон, се разбира како предлог на Нимиц,предвидува новото име Република Северна Македонија да помине на Советот за безбедност на Обединетите нации, кој со одлуката би препорачал тоа да го користат сите членки на светската организација во билатералните односи со Македонија.

Се работи за тн. тивко решение на суштинскиот проблем за Македонија- именувањето на нацијата и јазикот. Имено, со терминот „македонски“ тие би се впишале во регистарот на ОН без неопходно одобрение од Грција, според речникот на светската организација (glosssary), со што таа практично не би можела да го блокира.

Според атинскиот весник, „стапицата“ ќе биде „збогатена“ и со менување на тактиката на Американците што ја користеше претходната администрација на Буш. Тие ќе се впуштат во оспорување на грчките аргументи пред самитите на членките на НАТО и ЕУ, планирани наредната година.

„Елефтеротипија“ потсетува дека и пред Букурешт имаше силен американски притисок, но Атина не попушти и со вето го спречи приемот на Македонија во НАТО.

Некои македонски аналитичари пишувањето на „Елефтеротипија“ го оценија како пробен балон за македонската јавност, односно подготвување на „терен“ за „разумниот кмпромис“ (промена на името и „заштитени“ идентитетот и јазикот). Па препорачуваат земјава да не попушти пред грчките притисоци, особено ако се има предвид дека се води постапка пред Меѓународниот суд на правдата која нема шанси да не ја добие.

Можеби е најповолен момент, доколку „стапицата“ се уште не е докрај „поставена“, Република Македонија да истапи со свој предлог; кој е најповолен, а со оглед дека компромисно решение мора да се изнајде што поскоро ( досега повеќе пати посочив на него во некои текстови на овој блог): не „двојна формула“, туку алтернативни имиња (две или три, со задржување на уставното „Република Македонија“, а за што треба да се води „последна битка“) со еднакво значење и валидност- Република Северна Македонија, Република Вардарска Македонија…, па „кој што сака нека избира“.

Изгледа ступидно, ама нема друго кога проблемот на Грција е ептен ступиден. И онака најнакрај, со вакво решение  во колоквијалниот, па и „официјалниот“ говор ќе остане само „Македонија“ (исто како Грција, Финска итн.итн.).

Впрочем, и весникот „Елефтеротипија“ во април годинава цитираше една статија на професор на Солунскиот универзитет „Аристотел“:

„Скопјаните, кои се подготвуваат за компромис – ако тоа се случи, ќе продолжат да ја нарекуваат својата држава ‘Македонија’, како и повеќето од другите земји, затоа што така навикнале“.