По црвениот ќилим пред почетокот на церемонијата на отворањето се прошетаа Вуди Ален и неколкумина глумци од неговиот филм- Овен Вилсон, Рејчел Мекадамс, Ејдриен Броди и Мајкл Шин. На свеченоста присуствуваа и Роберт де Ниро, Емир Кустурица, Антонио Бандерас, Мелани Грифит, Салма Хаек, како и други членови на жирито.

На Бернардо Бертолучи, добитник на два Оскара за фимот „Последниот кинески цар“, му е доделена почесна Златна палма за севкупната кариера.

„Малку чекав, ќе ја добијам мојата Златна палма“, изјави доаѓаќи на свеченоста во Палатата на фестивалот во инвалидска количка. Наградата им ја посвети на „сите Италијанци кои и натаму имаат сила да се борат, да критикуваат и да негодуваат“.

Во натпреварувачката програма се филмовите „The skin I live in“ на Педро Алмодовар, „House of tolerance“ на Бернардо Бертолучи, „Pater“ на Ален Кавалие, „Footnote“ на Џозеф Седар, „Once upon a time in Anatolia“ на Нури Билге Цејлан, „The kid with a bike“ на браќата Дарден, „The artist“ на Мишел Хазанависиу, „Le havre“ на Аки Курисмаки, „Sleeping beauty“ на Џулија Ли, „Poliss“ на Мајвен, „Tree of life“ на Теренс Малик, „The source“ на Раду Михајлену, „Hara kiri“ на Такаши Мике, „We have a pope“ на Нани Морети, „We need to talk about Kevin“ на Лин Ремзи, „Мајкл“ на Маркус Шлајцнер, „This must be the place“ на Паоло Сорентини, „Меланхолија“ на Ларс Фон Трир и „Drive“ на Николас Виндинг Рефн.

Посебно внимание предизвикува шокантниот 90- минутен документарен филм на британскиот глумец и режисер Кит Ален „Unlawful Killing“ („Неправедно убиство“), кој содржи црно- бели слики од принцезата Дијана веднаш по несреќата во Париз во 1997. година. Вакви фотографии досега не биле прикажани во Велика Британија, а ниту филмот, како што се тврди, нема да се емитува таму (ќе биде прикажан и во САД и во други држави во светот). Во Кан ќе биде прикажан в петок.

Мохамед Ал Фајед,чиј син Доди исто така загина во несреќата, наводно финансиски го поддржал филмот, но не знаел дека се планира објавување на фотографии снимени непосредно по несреќата.

„Тој ќе ги преземе сите неопходни чекори за овие фотографии да не се најдат во филмот“, изјавил неговиот портпарол, објави Fox News.

Принцовите Вилијам и Хари не коментираат, но извори блиски до нив за медиумите велат дека сосема сигурно би биле згрозени.

„Британските адвокати бараа да се цензурира на 87 места“, изјави режисерот Ален за „Гардијан“. „Мојот филм за истрагата содржи снимки од Дијана во кои таа зборува дека кралското семејство сакало да ја смести во ментална установа и истражен судија кој повторува дали некој се запрашал дали оваа несреќа е повеќе од несреќа“.

Во официјалниот трејлер за филмот се наведува дека Дијана 4 години пред несреќата испратила писмо на пријател во кое вели дека ќе биде убиена, а нејзиниот сопруг планира сообраќајна несреќа.

По 6- месечна истрага по несреќата, судот во 2008. заклучи дека Дијана и Доди загинале поради невнимателно возење на пијаниот возач Хенри Пол, кој исто така загина, и дека за да дојде до несреќата придонеле папараците кои го следеле возилото. Мохамед Ал Фајед изнесе сомневања дека кралското семејство сакало да ја спречи Дијана да се омажи со неговиот син.

Со жирито на Канскиот фестивал претседава оскаровецот Роберт де Ниро.

„Не знам што да очекувам, ќе видиме. Непречемо да се гледаат толку филмови за толку малку време, за мене е крајно необично и фантастично“, изјави тој.

Двојниот добитник на Златна палма Емир Кустурица претседава со жирито на секцијата „Извесен поглед“ во која се наградуваат помалку познати режисери.

Канскиот фестивал ќе трае до 22. мај.

Денешниот 24- часовен генерален штрајк, со засега 8-мина повредени, сигурно нема да биде последен. Реакциите и отпорот на народот од ден на ден се се поголеми.

Во целата земја се паралзиирани многу јавни и приватни служби, како и фирми, а се случија и судири на демонстрантите со полицијата во текот на маршот во Атина.

Штрајкот го организираат двете водечки синдикални конфедерации во грчкиот јавен и приватен сектор- ADEDY и GSEE , кои имаат околу 2 милина членови. И вработените во атинското метро одржаа повеќечасовен прекин на работата во знак на солидарност, а тоа го направи и синдикатот кој ги претставува вработените во банките- OTOE, притоа нагласувајќи дека одбива каква било дискусија за намалување на платите. Денеска штрајкуваа и грчките новинари кои се исто така незадоволни од својата ситуација поради острите мерки на штедење.
Штрајкот е еден од најголемите во оваа година, а е организиран како одговор на работниците, службениците и пензионерите на се поголемиот товар врз нив од економската стабилизација и мерките на штедење.

Судирот во Атина го предизвикаа млади кои учествуваа во демонстративниот марш низ Атина. Со камења ги гаѓаа полициските сили, а тие одговорија со солзавец и шок- бомби.
Владата на Папандреу е со став дека мерките се единствен пат да се намали дефицитот во државниот буџет и предуслов да се добијат кредитите кои на Атина и ги ветија Меѓународниот монетарен фонд и европските финансиски институции, во износ од 110 милијарди евра.
Според многумина, Владината политика е без излез, само создава сиромаштија и невработеност, па се бара нејзина оставка.

Еве некои интересни согледби:

Државните службеници во Грција начелно можат да одат во пензија и пред да наполнат 50 години, а тоа предизвикува дефицитот на пензискиот фонд да расте побрзо одошто каде било во Европа. Реформите би требало да го отежнат заминувањето во предвремена пензија, но постојат и низа специфични правила. На пример, немажените или разведените ќерки на државни службеници, по смртта на двајцата родители, и натаму ја примаат нивната пензија. Таа повластица ја уживаат околу 40.00 Гркинки и само тоа ја чини државата 550 милиони евра годишно.

Вработените во Грција навикнале нивната плата да е само основа кон која се додаваат разни награди, па заработката на државен службеник може додатно да се зголеми дури и до 1.300 евра месечно. И тоа доколку знае да користи компјутер, знае странски јазик, но и ако не доцни на работа!

На другите Европјани особено им пречи навиката на Грците да делат не само 13-та, туку дури и 14-та плата.  Половина месечна плата се добива за Велигден, втората половина за годишен одмор, а 14-та плата се дели за Божик. Со мерките на штедење Владата веќе ги намали повеќето награди за 12%, а додатните плати за цели 30%, со што се надева дека ќе заштеди 1,7 милијарди евра.

Уште еден грчки „специјалитет“:

Обичај е кога за некој проблем постојат различни мислења и интереси да се формира посебен совет кој го решава. Бидејќи проблеми има многу, и советите не можат да се избројат. Посебно се истакнува советот кој управува со езерото Копијас, кое пресушило уште во 30-тите години на минатиот век, а што, се разбира, не им пречи на членовите на тој совет за својот труд и работа и натаму да примаат плата. Впрочем, како и повеќето од 10.000 „стручњаци“ кои Владата во Атина ја чинат повеќе од 100 милиони евра годишно. Најавено е дека најмалку 200 комисии или ќе бидат укинати или повеќето од нив споени во една.

Од околу 11 милиони жители на Грција, државата е работодавач за над половина милион, и покрај тоа што некои државни претпријатија создаваат со години големи загуби. Посебно се истакнува авиокомпанијата „Олимпик ервејз“, која со години не била дури ни на нула, но на вработените воопшто не им е лошо- и тие и нивните семејства имаат право бесплатно да летаат каде што ќе посакаат.

Државата е сопственик на 74 претпријатија и речиси во сите има многу повеќе вработени отколку што е потребно. На пример, во грчката државна железница има 9.000 вработени, а во 2008. имала 800 милиони евра загуба.

Освен САД, ретко која држава троши толку пари за одбрана како Грција. Во изминатите години беа издвојувани дури 6% од БДП, односно 14 милијарди евра годишно, од кои речиси 80% се трошок за персоналот и управата.

Меѓутоа, од друга страна некои државни службеници заработуваат многу помалку од нивните колеги во други земји на ЕУ. Така, учителите, пожарникарите или ѓубреџиите добиваат во просек 41% од она што за истата работа го добиваат нивните колеги во Германија.

Грчката влада во мај минатата година пропиша минимална плата од 740 евра, што е одвај доволно за живот. Платите надвор од Атина се уште помалку, а трошоците за живот се се повеќе слични на оние во Европа. Всушност, помеѓу „старите“ членки на ЕУ постои само една земја во која државните службеници добиваат помали плати- Португалија.

Каква последна- претсмртна видео порака снимил Ладен?

Очекувано одговор на Ал Каеада: први жртви на одмазда

Се чини дека во наредните часови, денови, недели, можеби и месеци (имајќи го предвид „редоследот“) дежурна тема, што ќе рече секојдневна, ќе биде убиството на Осама бин Ладен. Нема да ја замени ниедна друга, освен ако се случи некаква катастрофа- катаклизма (не дај Боже) или, на пример, дојде до „ненадејна средба“ на човечката со друга, непозната, вонземна цивилизација.

Официјално:

Со анализа на ДНК е потврдено дека водачот на терористичката организација Ал Каеда е убиен. Со анализата е утврдено совпаѓање на ДНК, а потоа неговото тело е погребано, изјави официјално лице под услов да остане анонимно.

Како што соопшти вишо разузнавачко лице на конференција за новинари, САД користеле повеќе различни средства за идентификација. Притоа додал дека жена, веројатно сопруга на Бин Ладен, го потврдила неговиот идентитет.

Пакистанската телевизија објави фотографија на убиениот бин Ладен. Погребан е в море оти се сакало по секоја цена да се избегне гробот на Бин Ладен да стане место на аџилак. Притоа, Американците ги почитувале сите верски обврски. Имено, според исламската традиција телото мора да го измијат муслимани и да го погребаат што е можно побрзо, најчесто до следната молитва, иако може да има одложувања под посебни околности.

Фотографијата не мртвиот Осама не ги убеди баш сите дека е тој навистина мртов. Имено, таа има премногу сличности со една која е направена додека бил жив. Автентичноста не ја потврдија американски, а ни пакистански официјални лица. Телевизијата NBC јави дека добила предупредување од две американски официјални лица оти фотографијата е лажирана!

Во меѓувреме, француската новинска агенција АФП извршила проверка на веродостојноста со специјален софтвер. Било потврдено дека станува збор за фотомонтажа, на која била искористена брадата и долниот дел од лицето на Бин Ладен.

„Брадата на снимката е матна. Јасно се гледа дека тоа е фотомонтажа“, изјавил главниот уредник на фотографскиот сектор во АФП, Младен Антонов.

Според „Асошиејтед Прес“, Белата куќа сеуште не одлучила дали да објави фотографски докази дека водачот на Ал Каеда е мртов.

Најнова вест:

Амбасадорот на Пакистан во САД, Хусаин Хакани, изјави дека Исламабад ќе преземе целосна истрага за пропустите на неговите разузнавачки служби во потрагата по Осама бин Ладен.

„Очевидно е дека Бин Ладен имал мрежа која го поддржувала. Треба да дознаеме дали таа мрежа се наоѓала во Владата, во пакистанската држава или пакистанското општество“, објасни тој во интервју за Си-Ен-Ен.

Ќе биде извршена целосна истрага за да се утврди зошто пакистанските разузнавачки служби не успеале да го откријат порано.

Пакистанскиот претседател Асиф Али Зардари денеска негираше дека пакистанските безбедносни сили го криеле Бин Ладен, истакнувајќи дека соработката со САД придонела да биде лоциран најбараниот терорист во светот.

Тоа е прв официјален одговор од Пакистан на сомневањата кои ги изнесоа одделни американски претставници и други критичари, а кои би можеле дополнително да ги влошат односите помеѓу Исламабад и Вашингтон во критичен момент за војната во Авганистан.

Од друга страна, „Њујорк тајмс“ објави дека официјален Пакистан знаел каде се крие водачот на Ал Каеда!

И уште една очекувана, загрижувачка вест:

Само неколку часа по објавувањето на веста дека Осама бин Ладен е убиен во Пакистан, во земјата во близина на една џамија во Чаршада одекнала експлозија во која загинаа жена и три деца.

Истовремено, во САД безбедносните мерки се подигнати на највисоко ниво.

Светот е внимателен поради можните одмазди на Ал Каеда. Тоа најмногу се забележува на аеродромите во Лос Анџелес и на улиците на Њујорк, што не би требало да зачудува со оглед на тоа дека од Пакистан веќе пристигнаа првите закани од следбеникот на бин Ладен.

Американски разузнавачи веруваат дека водачот на Ал Каеда непосредно пред смртта снимил пропагандна порака која наскоро би можела да се појави во јавноста. Не е јасно дали се работи за аудио или видео снимка, но едно неименувано американско официјално лице тврди дека материјалот веќе влегол во „процедура“ за објавување во медиумската мрежа на Ал Каеда. Тој вели дека нема назнаки оти Бин Ладен во моментот на снимање на пораката знаел дека минутите му се изброени.

Советот за безбедност на ОН го поздрави фактот дека Осама бин Ладен веќе нема да биде во можност некому да му наштети и истакнува дека таа вест претставува „суштински напредок“ во борбата против тероризмот.

Високата претставничка на ЕУ за надворешна политика и безбедност, Кетрин Ештон, изјави дека со убиството на Бин Ладен и е зададен удар на Ал Каеда и на терористичките активности ширум светот.

„Сега треба да сториме се што е во наша моќ во целост да ја онеспособиме Ал Каеда, зашто постои голем ризик од одмаздничка акција“, додаде таа.

Кина е последната голема земја која реагира на смртта на Осама бин Ладен. Оценува дека неговото убиство е „позитивен развој на настаните“ во борбата против тероризмот и повикува на јакнење на соработката во светот во таа борба.

САД ги затворија за јавноста амбасадата и три конзулати во Пакистан откако Осама бин Ладен е убиен во близина на престолнината Исламабад.

Повеќе стотици луѓе вчера излегоа на улиците во југозападниот град Кета, во близина на границата со Авганистан, за да му оддадат почит на бин Ладен и да протестираат против САД.

Објавено е дека претседателот на САД, Барак Обама, и негови најблиски соработници во Белата куќа во живо го следеле убиството на Осама бин Ладен. На шлемот на еден од специјалците, припадник на единицата „фоки“, била прицврстена камера која го пренесувала текот на акцијата кон Вашингтон.

Инаку, по смртта на бин Ладен се појавија шпекулации за тоа кој ќе стане нов лидер на Ал Каеда. Според мислењето на разузнавачки стручњаци, прв кандидат за наследник е Египтјанинот Ајман ел- Завахри (59) кој беше личен лека на бин Ладен.

Интересно е дека оперативците на ЦИА за Осама бин Ладен користеле шифрувано име „Џеронимо“. Кога водачот на Ал Каеда паднал смртно погоден, официјалната информација од ЦИА за претседателот Обама не била „Бин Ладен е мртов“, туку „Џеронимо е мртов во акцијата“.

Џеронимо (1829. – 1909.) е американски Индијанец, припадник на племето Апачи, кој се борел против Американците и Мексиканците кои сакале да ги прошират своите територии на сметка на земјата на Апачите. По години минати во бегство и борба, умрел како затвореник на САД.

Последна вест:

Синеастите кои ја снимија драмата за борбата против терористи „Катанец за бол“ подготвуваат акционен трилер за потрагата по Осама бин Ладен.

Како што јавија светските агенции, лице блиско на проектот, кое инсистирало да остане анонимно оти нема одобрение да зборува, рекло дека оскаровката Кетрин Бигелоу и сценаристот Марк Бол веќе неколку месеци работат на тоа проектот да биде фокусиран на акција на фаќање на водачот на Ал Каеда.

„Холивуд рипортер“ објави дека Бигелоу сигурно ќе го менува сценаериото со оглед дека американските сили го убија бин Ладен во ноќта помеѓу саботата и неделата во Пакистан, а нејзиниот проект бил заснован на еден поранешен обид на фаќање на водачот на Ал Каеда кој завршил со фијаско.

Објавени се детали:

Куќата- засолниште на Ладен е откриена  во пакистанскиот град Аботабату. Во луксузната куќа – бункер,којаш аериканската тајна служба ја открила минатото лето, Бин Ладен живеел со своето семејство и братот. Таа не била опремена со систем за врски и интернет зашто Бин Ладен стравувал дека САД ќе се обидат да дојдат до него со помош на електрониката.

Ја нападнале четири воени хеликоптери, а според разузнавачките информации на ЦИА, тим од 6-мина командоси на единицата „Фоки” во неделата наутро спровела акција со која командувал лично шефот на ЦИА, Леон Панета. Информацијата за локацијата дошла по апсењето на истакнат член на Ал Каеда со потекло од Индонезија. Според еден сведок, соработниците на Бин Ладен од покривот на куќата почнале да пукаат кон хеликоптерите, а специјалците возвратиле. Бин Ладен бил застрелан во главата додека се обидувал да избега од специјалците преправајќи се како жена. Еден од хеликоптерите бил урнат.

Операцијата траела околу 40 минути, а во неа биле убиени уште четворица луѓе, меѓу кои и еден од неговите синови.

ББС објави снимки на кои се гледа спалната соба во која за време на пукањето се криеле неколкумина.

Веднаш по акцијата, пакистанските власти ги уапсиле другите 6 сина на Бин Ладен, 3 негови сопруги и 4 соработници.

Општа е оценката дека ликвидирањето на Бин Ладен е триумф на демократијата во војната против тероризмот.

А веднаш по обраќањето на Барак Обама, Американците спонтано се собраа пред Белата куќа и некогашниот Светски трговски центар за да ја прослават смртта на човекот кој го сметаа за свој најголем непријател.

Можно е допрва да се јават шпекулации, па и сомнежи за убиството на Бин Ладен. Тие најнапред се поврзуваат со нејасната судбина на неговото тело. Американски претставници тврдат дека веќе го погребале на непозната локација во море, но се појавија информации дека тоа се уште се наоѓа во некоја од американските бази во Авганистан или Пакистан.

Додатни сомнежи и контроверзи предизвикува единствената слика која американските власти ја понудија како доказ за смртта на Бин Ладен. Лондонскиот „Гардијан“ тврди дека е таа монтажа направена од слика на Бин Ладен од 1998-ма година и непознат убиен терорист.

Сепак, засега останува како официјален став: ДНК испитувањата потврдиле дека убиениот е Бин Ладен.

Десната рака на Бин Ладен, египетскиот доктор Ајман Ал-Завахири најверојатно ќе го наследи на челната позиција на терористичката организација Ал Каеда. За него се смета дека е мозокот на операциите.
Дали од денеска светот е побезбеден?

Изјава на Јежи Бузек, претседател на Европскиот Парламент:

„Денеска се разбудивме во побезбеден свет. Смртта на Осама Бин Ладен означува важен успех во борбата на меѓународната заедница против терористите, иако оваа борба не е завршена“.

Оптимизмот не е толку голем, колку што од час во час се зголемуваат стравувањето и неизвесноста за иднината. Една реакција на шефот на европските либерали се оценува како најумерена: изрази жалење што правдата не беше задоволена пред меѓународен суд и предупреди оти од денеска треба внимателно да се постапи со арапскиот свет за да не се родат нови генерации фрустрирани од Западот.

Кренат е црвен аларм од страна на Интерпол – опасност од зголемен степен на тероризам.

„Најбараниот терорист на светот не е веќе помеѓу нас, но неговата смрт не претставува исчезнување на разни организации како Ал Каеда или организации кои се инспирирани од неа и кои продолжуваат да се вклучуваат во терористички напади ширум светот“, изјави Роналд Нобл – генералниот секретар на Интерпол.

Ал Каеда е терористичка организација која не е централистички организирана и не се финансира само од еден извор. Од друга страна, Талибанците се поддржани од многу авторитетни структури во Пакистан, а сојузот на Ал Каеда и Талибан не е идеолошки, туку брак од интерес: Бин Ладен на Мули Омар му даде пари, а тој на Ал Каеда и ги даде планините на Авганистан за престој и обука на терористи.

Заедно со веста за убиството на Осама Бин Ладен сите светски агенции ја проследија и со потсетување кој е тој и како стана светски терорист број 1:

Роден е во 1957-ма година во богато јеменско семејство. Работи за семејниот бизнис кога саудиските тајни служби од него ќе побараат да регрутира муџахедини за борба со советските трупи во Авганистан.
Радикалниот ислам почнува да зазема моќни позиции во регионот, особено што неговите поддржувачи во таа опција гледаат успешна борба со комунизмот. Арапските и парите на Американците му помагаа на Бин Ладен да изгради силна организација и во 1989. да стави крај на борбата со советскиот комунизам. Но, Осама решава да продолжи понатаму.

Во 1993-та е нападнат Светскиот трговски центар во Њујорк. 6-мина луѓе загинуваат и илјадници се ранети. Некои луѓе веќе почнуваат да се сомневаат во Осама Бин Ладен.

Американците го обвинуваат и за нападот во Кенија во близина на американската амбасада, кога загинаа 224-ца луѓе и исто така илјадници се повредени.

Вашингтон понуди 5 милиони долари за секој кој ќе даде веродостојна информација за тоа каде е Бин Ладен, а во 1999-тата ФБИ го става во 10-темина најбарани злосторници.

Сепак, вистинската точка на пресврт се случува во 2001-та, на 11. септември, со нападот врз кулите близначки. Илјадници луѓе загинуваат и илјадници се повредени. Виновникот е посочен – Осама Бил Ладен и неговата Ал Каеда. Иако никогаш не презема одговорност за тоа, Бин Ладен отворено искажа пофалби за сите кои во тоа учествувале. Реакцијата беше жестока. Џорџ Буш пресече – најдете го жив или мртов. Вашингтон му објави војна на глобалниот тероризам. Се до денес тој испраќаше подбивни пораки до светските лидери.

Светот стравува поради најновата експлозија на третиот реактор на јапонската нуклеарна централа, 240 километри источно од Токио, што беше оштетена во земјотресот. Над Фукушима 1 се крева голем облак чад, но властите тврдат дека куќиштето издржало и радијацијата е во прифатливи граници. Во експлозијата на исчезнале 7-мина луѓе, а тројца се повредени. Од неговата околина се евакуирани над 180.000 луѓе, а 22-ца се однесени на лекување поради изложеност на зрачење.

Инженерите објаснуваат дека детонацијата ја предизвикал насобраниот водород. Тие веќе четврти ден се обидуваат да ги изладат реакторите откако земјотресот и цунамито го уништија системот за ладење.
Вонредна состојба е прогласена и во нуклеарната централа во Онагава, каде беше регистриран висок степен на радиоактивност.

Во меѓувреме властите го повлекоа предупредувањето за цунами по најновиот потрес од 6 степени според Рихтер.

Премиерот на Јапонија, Наото Кан, изјави дека ова што и се случи на државата е најтешката криза по Втората Светска војна.
По земјотресот со магнитуда од 9.0 степени според Рихтер, на Јапонија и се заканува и ерупција на вулкан, чие реагирање го следат јапонските власти.

Цунамито потопи цели градови. По исчезнати тела се уште се трага, а најнова вест е дека неколку илјади се најдени на плажите во погодените места.

Во областа пристигна американскиот носач на авиони „Роналд Реган“, кој ќе учествува во давањето логистика и помош, а таа пристигнува од целиот свет.

Утврдено е дека причина за катастрофата е навлегувањето на една под друга континентална плоча, кои пливаат на магма под Земјината површина.
Очекувано или не?

НАСА и италјанскиот Институт за геофизика и вулканологија. открија дека разурнувачкиот земјотрес во Јапонија го намали денот за 1,6 микросекунди, а оската на ротација на планетата земја е поместена за 10 сантиметри. Всушност, станува збор за стегање на Земјината кора и намалување на пресекот на Земјината топка. Тоа едновремено значи зголемување на сопствената ротација. Според стручњаците, овие промени краткорочно нема никако да влијаат врз луѓето, но долгорочно се случува процес на менување на постојните карактеристики на планетата.

Научниците од Американскиот геолошки институт пресметале дека ослободената енергија е еквивалентна на месечната потрошувачка на енергија во САД, а неговата силина била толкава што го поместила јапонскиот остров Хоншу за 2,4 метри кон исток.

Многумина лаици и лековерни луѓе се прашуваат дали крајот на светот веќе започна, а земјотресот во Јапонија е само почеток на слични, дури и поголеми разурнувања? Да потсетам, според пророштвата на древните Маи, денот кога ќе се случи тоа е 21. декември 2012. година.
Нема место за загриженост! Никаков крај на светот ќе нема на тој ден идната година. Тоа го тврди еден од челниците на индијанскиот народ Маи од Гватемала, Аполинарио Чиле Пикстун. Според него, теориите за судниот ден протекле од Западњаците, а не од Маите. Точно, значаен период за нив завршува на посочениот датум, но тие никогаш не рекле дека на светот ќе му дојде крајот.

Имено, археолозите, астрономите и Маите велат дека единственото нешто што веројатно ќе ја погоди Земјата е всушност дожд од метеори. Таканаречените New age филозофии, поп астрономиите, интернетските гласини за пропаста на светот и телевизиските специјални канали како History Channela, ги измешаа предикциите на Нострадамус и Маите. Претпоставките настанаа откако беше прикажана плоча на Маите пронајдена во урнатините во јужен Мексико, за време на работите на автопатот во 1960-тите години. Голем дел од неа е оштетен, а дел украден. Меѓутоа, во она што останало е содржан датумот 21.12. 2012.

Натписот опишува нешто што би требало да се случи тогаш и што го вклучува и Bolon Yoktu, мистериозниот Бог на Маите поврзан со војната, но и со креацијата. Поради оштетувањето на каменот, крајот од одломката е речиси нечитлив.

Археологот Гилермо Бернал интерпретира дека последните глифови би можеле да го имаат следново значење: „Тој ќе се спушти од небото“. Бернал додава дека записите на Маите одат и потаму од 2012. година, а еден ја вклучува и годината 4772.

Календарот на Маите започнува 3.114 г.пред Христа, а периодите на тн. Бактуни имаат отприлика 394 години. 13 е значаен, свет број за Маите, а 13-от Бактун завршува на 21. декември 2012.

Маите никогаш не рекле дека на светот ќе му дојде крајот, никогаш не рекле дека нешто лошо неизбежно ќе се случи, заклучува Дејвид Стјуарт, од универзитетот во Тексас.

(На веб порталот „Паноптикум“ е објавен прилог за „крајот на светот“, подготвен со користење на повеќе текстови објавени на Интернет.)

Прочуениот гитарист почина денеска на одмор во Шпанија во 58. година од животот.

Изутрината, во раните утрински часови Мур е пронајден мртов во соба во хотелот Кемпински во шпанското место Естепона, близу до Малага. Веста за смртта на гитаристот, што ја пренесе Би- Би-Си, ја соопштил Адам Парсонс, менаџер на составот „Тин Лизи“ (Thin Lizzy).

Гари Мур е роден  во 1952. година во Белфаст. Кариерата започна да ја гради во текот на 60. години од минатиот век. Започнува да свири на рана возраст, кога на неполни 8 години ја добива првата акустична гитара. На 14 години научува да свири со десна рака, иако е левучар. Уште како средношколец соработувал со пејачот Фил Линот, на чиј наговор влегува во бендот „Thin Lizzy“. Мур во бендот го замени гитаристот Ерик Бел.

Во текот на кариерата Мур соработувал со многумина музичари, меѓу кои B. B. King, Albert King, Collosseum II иGreg Lake, а одредено време свирел и со ирскиот бенд „Skid Row“.

Првиот соло албум „Grinding Stone“ го објави во 1973. година. Кон крајот на 70- тите во соработка со Линот го објавува еден од неговите најуспешни синглови „Parisienne Walkways“.

По бројни ангажмани во рок музиката, Мур му се врати на блузот со албумот„Still Got the Blues“, на кој му помогнале Albert King, Albert Collins и George Harrison.

Последниот студиски албум, „Bad for you Baby“, го објави во 2008. година.

Албуми на Гари Мур:

„Grinding Stone“ – 1973, „Parisienne Walkways“ – 1977, „Back on the Streets“ – 1978, „Corridors of Power“ – 1982, „Live at the Marquee“ – 1983, „Rockin’ Every Night — Live in Japan“ – 1983, „Victims of the Future“ – 1983, „Dirty Fingers“ – 1984, „We Want Moore“ – 1984, „Run for Cover“ – 1985, „Wild Frontier“ – 1987, „After the War“ – 1989, „Still Got the Blues“ – 1990, „After Hours“ – 1992, „Blues Alive“ – 1993, „Ballads & Blues 1982-1994 – 1994, „Blues For Greeny“ – 1995, „Dark Days in Paradise“ – 1997, „Out in the Fields — The Very Best of Part 1“ – 1998, „Blood of Emeralds — The Very Best of Part 2“ – 1999, „A Different Beat“ – 1999, „Back to the Blues“ – 2001, „Power Of The Blues“ – 2004, „Old New Ballads Blues“- 2006, „Close Aas You Get“- 2007 и „Bad for You Baby“- 2008.

Најголемата поддршка што во последно време САД и ја даваат на една земја е Република Македонија. Во подолг период, а вистинска кулминација доживеа на штотуку завршениот самит на НАТО во Букурешт- Романија. Тоа не значи никаква утеха за „поразот“ со недобивањето на покана за членство (во наводници зашто веќе го искажав и аргументирав ставот дека всушност е поразена, и тоа жестоко, Грција- удавена во сопственото примитивно националистичко мочуриште), туку нешто што веќе ги загрижува и нашиот јужен сосед (поради последиците од „Пировата победа“ која е пред се над најмоќната сила на светот), но и нејзините европски сојузници во НАТО (не сите). Ова особено се однесува на земјите од „стара Европа“.

Од говорот на претседателот на САД, Џорџ Буш, на централниот плоштад во Загреб, пред илјадници граѓани, како и државните раководители на Хрватска, Македонија и Албанија:

„Американската позиција е јасна: Македонија треба да го заземе своето место во НАТО што е можно побрзо“.

Изразувајќи жалење поради тоа што НАТО не и врачи покана на Македонија на самитот во Букурешт само поради нејзиното име, тој истакна:

„Македонија спроведе тешки реформи во земјата и придонесува значајно во мисиите на НАТО во странство. За жал, поканата за Македонија беше одложена поради несогласувањето околу нејзиното име. Во Букурешт сојузниците во НАТО се согласија дека штом ова прашање биде решено, на Македонија ќе и биде упатена покана.

Почестен сум што сум овде со лидерите на Македонија, Албанија и Хрватска. САД ја ценат водечката улога што ја покажавте во остварување на целите за слободата. Се радуваме што Албанија и Хрватска се поканети во НАТО и го очекуваме моментот Македонија наскоро да се придружи на овој голем сојуз за слобода“.

Тој нагласи дека поканата за влез во НАТО за Хрватска и Албанија е глас на доверба дека ќе продолжат со потребните реформи и силно ќе придонесуваат за вредностите на Алијансата.

„Од овој момент па натаму, ако каква и да е опасност им се закани на вашите народи, САД и НАТО ќе стојат со вас и никој никогаш повеќе нема да може да ви ја земе слободата“, нагласи Буш пред претседателот и премиерот на Македонија, Бранко Црвенковски и Никола Груевски.

„Денес војниците од Македонија, Албанија и Хрватска храбро служат во Авганистан, да му помогнат на народот и да обезбедат посигурна иднина. Денес силите на Македонија, Албанија и Хрватска служат и во Ирак, помагајќи да се изгради општество кое го одбива теророт и живее во слобода“, потенцира американскиот претседател.

Дали инцидентот барем малку ќе го „вразуми“ Берлускони, да ја намали „дозата“ на забава и иритирање на јавноста? Тешко да се поверува.

73- годишниот Берлускони е удрен в лице додека го напуштал плоштадот во Милано по одржан говор. Одел кон својот автомобил, а напаѓачот успеал да се пробие до него и да го нападне. Берлускони е веднаш префрлен в болница.

Според италијанските медиуми, пред митингот Берлускони бил пресретнат од група луѓе кои го нарекле „палјачо“. Тој неколку пати им вратил со зборовите „Засрамете се!“

Полицијата веднаш го привела 42- годишниот Масимо Тартаља, кој веќе 10 години страдал од психички проблеми. Обвинет е за планирано „нанесување на тешки повреди“. Тој, пак, му напиша писмо на премиерот во кое изразува „длабока вина и жали поради кукавичкото и непромислено дело“. Неговите адвокати соопштија дека дејствувал целосно самостојно, исклучувајќи секаква политичка заднина и евентуална политичка припадност. Татко му изјавил дека неговиот син со години е психички нестабилен.

Инаку, ова не е првпат Берлускони да биде жртва на напад. Сличен инцидент му се случи во Рим на новогодишната ноќ во 2004. година, кога врз него беше фрлен фотоапарат.

Интересно, репликата на Готската катедралата во Милано изградена во 1386. година, која е висока 10 сантиметри, стана култен сувенир во градот. Помеѓу жителите и туристите бележи одлична продажба. Се продава на штандовите за весници, но и по туристичките киосци по ценма од 12 евра.. Продавачите изјавуваат дека туристите не само што ја купуваат, туку и ја сликаат.

Познато е дека  годинава Берлускони мина и минува низ тежок период поради постојаните обвинувања за корупција и врски со италијанската мафија, а кои тој ги демантира. На почетокот од годинава на јавноста и се откриени и неговите секс-скандали, по што неговата сопруга го напушти и се разведе.

Меѓутоа, во изминативе неколку години- минатата, предминатата (лани во септември, а во 2007. на крајот од јули) се случувало истото- поплави со големи последици и жртви (лани во Велс, југозападна и северните предели на Англија).

Агенциите јавија дека жителите во погодените краишта со невремето останаа блокирани во нивните поплавени куќи.

Во инаку живописната Езерска област (Lake District) воени хеликоптери и гумени чамци на цивилната заштита го евакуираат населението. Воени и спасувачки екипи трагаат по загрозени и исчезнати, а еден полицаец, кој во градот Воркингтон им се приклучил на спасителите, загинал кога под него се урнал мост кој бил однесен од поројните води.

„Полицаецот Бил Баркер умре во обид да спаси живот на други лица. Беше храбар човек“, изјави британскиот премиер Гордон Браун, кој вети итно испраќање на помош во погодените подрачја.

Британската метеорошка служба соопшти дека во Англија во изминатите 24 часа паднале најголеми количества на дожд измерени кога било- 314,4 милиметри.

Најтешко е погодено гратчето Кокермаут (Cockermouth), околу 530 километри оддалечено од Лондон, каде што се состануваат реките Кокер (Cocker) и Дервент (Derwent). Тамошната поплава е со „библиски размери“, а се спасени 200- мина луѓе. Нивото на водата во центарот на градот достигнало 2,5 метри.

Поплави ја погодија и шкотската област Дамфрис и Галовеј, каде што се затворени 30 патишта поради „несигурни“ услови, а во средниот и северниот дел на Велс се затворени патишта и е запрен железничкиот сообраќај.

Поради интензивните дождови и бурата до поплави исто така дошло и во Ирска, особено во центарот на вториот по големина град Корк (Cork). Поплавени се и 15- тина други градови и села. Ирската метеоролошка служба соопштила дека тамошниот дожд е најсилен и најдолготраен во последните 30 години.

Полицијата проценува дека околу 1.000 домови се уништени во поплавите, а Агенцијата за заштита на животната средина соопшти дека станува збор за поплави предизвикани од изобилни дождови што се случуваат еднаш во 1.000 години. Едновремено напомнува дека во еден ден паднало толку тожд колку што било очекувано во текот на целиот ноември.

Метеоролозите јавуваат дека ситуацијата и натаму ќе се влошува. Се очекува дождот да продолжи да паѓа и во наредните три дена.

Може ли и ова невреме, но и „чудниот“ топол бран деновиве на Западниот Балканот (и во Република Македонија) да се сметаат како последица од глобалното затоплување, како „продолжение на почетокот“ на светската еколошка кататстрофа? Многу веројатно.

Ова е една од најголемите загуби на војници на САД од војните во Ирак и Авганистан.

Напаѓачот бил вооружен со два пиштола, од кои едниот бил полуавтоматски. Еден сведок од базата изјавил дека војниците ја кинеле облеката за да направат завои за ранетите. Официјални извори не ја отфрлаат можноста некои лица да загинале од „пријателски оган“.

Хасан почнал да пука во медицинскиот центар врз колеги кои чекале во ред за лекарска проверка пред да заминат на фронтот или да се вратат оттаму. Потоа продолжил во центарот за подготовка и завршил на местото каде што се доделувале дипломи. На мајорот му било возвратено со оган и бил застрелан неколку пати.

39- годишниот Хасан е државјанин на САД од јорданско потекло, дипломиран психијатар. Пред тоа 6 години стажирал и работел во воената болница „Валтер Рид“ во Вашингтон. Таму имал тешкотии во комуникацијата со пациентите. На 28- ми ноември требало да биде разместен во Ирак и се чини дека бил „мошне вознемирен“ поради тоа, изјави една сенаторка од Тексас.

Испитувајќи ги мотивите за злосторството, откриено е дека ФБИ се интересирал за Хасан пред 6 месеци, кога на Интернет страницата Scribd автор потпишан како Нидал Хасан пишувал за бомбашите самоубијци во позитивно светло, споредувајќи ги со војници кои се фрлаат врз бомба за да ги заштитат соборците. Меѓутоа, не е потврдено дека се работи за Малик Надал Хасан.

„Њујорк Тајмс“ објави разговор со братучедот на Хасан, Надер Хасан, 40- годишен адвокат од северна Вирџинија, кој вели дека убиецот бил „смртно исплашен“ од можноста да го испратат во Ирак или Авганистан. Тој му се жалел дека го малтретираат во војската зашто е муслиман и сакал да излезе од неа, но не можел зашто требало да и плати долг за своето школување.

Базата „Форт Худ“ во централен Тексас е најголем објект на копнената војска во САД, која се простира на 64.000 хектари, а во неа се сместени околу 50.000 војници.

Изјава на американскиот претседател Барак Обама:

„Американски војници беа убиени и ранети во ужасен излив на насилство. Моите мисли и молитви се упатени кон семејствата на ранетите, загинатите и сите што служат во Форт Худ. Ужасно е што настрадаа во воена база на американско тло“.

Уште колку ли има „смртно исплашени“ дека ќе бидат испратени во војна, а кои би можеле да направат и поголеми злосторства? Дали навреме ќе се откријат?